മകനോട് മാപ്പ്

ഇന്നലെ അടി മുടി ഒന്നു പേടിച്ചു,
"കൂക്കു" വന്നു വല്ലാണ്ടായ മകന്റെ
വായില്‍ അവനറിയാതെ മരുന്നൊഴിച്ചപ്പോള്‍
ഒരു നിമിഷം അവന്‍ ശ്വാസം കിട്ടാതെ പിടഞ്ഞോ..??

മാപ്പ് നൂറായിരം...
നീ പിച്ചവെച്ച വഴിയില്‍‌,
നിന്റെ കൊഞ്ചലില്‍‌,
നിന്‍ തളിര്‍ മേനിയില്‍ പിടിച്ചായിരം മാപ്പ്..!!

മാപ്പ്... മാപ്പ്

പ്രാക്ക്

അവള്‍ നിന്നെ ചതിക്കും ഒരു വര്‍ഷത്തിനകം
അച്ഛന്‍ പറഞ്ഞു....
എന്തു നല്ല വീടായിരുന്നു,
നശിച്ചവള്‍ കാലുകുത്തി എല്ലാം തുലച്ചു
അമ്മയും പറഞ്ഞു...
ഈ കുത്തുവാക്കുകളും കറുത്തമുഖവും
എനിക്കു സഹിക്കാനവുന്നില്ല
ഭാര്യ എപ്പോഴും പറയുന്നുണ്ട്...


ഇടക്ക് ഞാനൊരു തുലാസ്സിലാടുന്നു
പിച്ചവെക്കാത്ത മകന്റെ കണ്ണിലെ
നിഷ്കളങ്കത വേട്ടായാടൂന്നു,
എന്റെ ദു:ഖം ആരോടു പറയും...???

മാപ്പ്

നിലാവു തേടിവലഞ്ഞരാത്രിയിൽ
പെയ്തുതീരാത്ത മഴയിൽ...
ഇല്ലാപ്പണത്തിൻ ഹുങ്കിൽ
ചെയ്തുകൂട്ടുമീ അപരാധത്തിന്റെ പാപം
പാവം അറിയാപ്പയ്തലിൻ മേൽ
ചേർക്കല്ലേ ലോകനാഥാ...!!

കളഞ്ഞ കാല്‍ത്തള

മകന്റെ ഒരു കാല്‍ത്തള കാണാതായി..
അലമാറയിലെവിടെയോ കുടുങ്ങിരിപ്പുണ്ടെന്നുഭാര്യ..

അയലത്തെ ചേച്ചി സഹായിച്ചു സഹായിച്ചു
കീശയിലാക്കിയെന്നു ഞാന്‍...

അച്ഛന്‍ അശ്രദ്ധയാണെന്നു
പതിവുപോലെ പിറുപിറുത്തു പഴിച്ചു...

പണ്ടു കോളേജിലക്ഷന്‍ കാലത്ത്
നഷ്ടപ്പെട്ട മോതിരമോര്‍ത്താവാം,അമ്മ
ഗൂഡാര്‍ത്ഥത്തില്‍ എന്നെനോക്കിച്ചിരിച്ചു..

പക്ഷെ, ഒമ്പതുമാസക്കരന് ഒട്ടും പരിഭ്രമമില്ല...
സ്വന്തമായുള്ളതെല്ലാം മിഥ്യയാണെന്നൊരുള്‍ക്കാഴ്ചയില്‍
സ്വന്തം പാല്‍‌പ്പല്ലുകാട്ടിയാര്‍ത്തുചിരിച്ചു...!!